Selasa, 17 November 2009

Partangiangan Ganup Ari Edisi Nopember 2009

TURPUK : MATEUS 10 : 16 B
Pantas ma hamu marroha songon ulok, huhut lidang ma rohamuna songon darapati!
HATORANGAN :
Didok angka pande bisuk “pandai-pandailah hidup” na boi dilapati, boi do bahenon segala cara boha ma asa mangolu manang marngolu. Molo tung pe sian dalan na so tingkos, tarjalo pingkiran ni pandohan na di ginjang i do. Jala jotjot do tong pingkiran songon na di ginjang i, diinterpretasihon halak laho mangantusi turpuk di bagasan minggu on, tarlobi rupani pandohan na mandok “marroha songon darapati jala marbisuk songon ulok”. Na jotjot tubu sala pangantusion taringot Hata ni Debata. “Ndang sude jadi alai boi do sude masa”. Seolaholah marhite pandohan i, boi do halak tu datu rupani mangido hamalumon ala marbisuk songon ulok, manang boi do korupsi sama-sama untung ala marroha songon darapati. Hape marhite turpuk on, tung tangkas do dipodahon asa saluhutna langka, pingkiran dohot pangalaho ingkon dibagasan hapantason na sian Tuhan i sambing. Asa ndang adong alternatif manang jalan keluar na asing, ia so marhitehon roha dohot habisuhon na hombar tu Hata ni Debata. Antong tajalo ma pangurupion sian Tuhan i, asa sanggup hita patuduhon roha na bisuk dohot roha na lindang hombar tu lomoNa, asa manang aha pe na masa di tongatonga ni ngolunta, sai Debata ma tapangasahon, asa tarpasupasu ngolunta. Amen.

TURPUK : TITUS 2 : 12
Diajari do hita, asa tasoadahon roha na so daulat ro di angka hisaphisap tano on, asa taparangehon hatomanon, hatigoran dohot hadaulaton, tagan di hasiangan on.
HATORANGAN :
Pangela ni portibi on dohot hagiotna tontu sian hajolmaon boi hita gabe tartait. Ala memang jotjot do rupani sai pintor hatop idaon panghorhonna, jala boi patubu halongangan. Alai pos ma rohanta, ndang leleng i masa, ndang leleng i martahan, ai tung tangkas do, saluhutna i parsatongkinan do. Na pasti, boi do hita gabe mardosa molo ndang tangkas rupani tauji sian haporseaonta, sian Debata do i manang sian portibi on. Ala na hot ro di saleleng ni lelengna, holan sian Debata Jahowa do mualna, ndang sian na asing manang sian hagogoon ni portibi on. Alai tubu ma sungkunsungkun, songon diama hita marnida huhut mananda i ? Tontu turpuk on ma naeng tangkas paingothon hita. Boasa? Ala sian hatutubunta pe nunga disahaphon Debata tu roha dohot pingkiranta dia ma na denggan dohot dia ma na roa. Holan i, ndang tandi jala ndang tandas taboto i, molo so tangkas mangguruhon Hata ni Debata. Di son ma peran ni natoras, songon pangajari tu angka ianakhon, dalan laho manulgulhon na naung saht i hian tu ganup jolma. Panghangoluhon dohot panandaion na tangkas di Hata ni Debata i do boi sanggup mangalo dohot malua sian pengela ni hagiot dohot hasonangan ni portibi na mangilas on. Alani tangkas ma tajamothon be dirinta, asa holan na sian Tuhan i, mian di ngolunta. Amen.

TURPUK : 1 TIMOTEUS 4 : 7 – 8
Pasiding ma angka turiturian na so gabeak, na so marnosan i. Pasomalsomal ma dirim mangulahon hadaulaton! Ai otik do guna ni na pabosihon daging; alai tu saluhutna do hasea hadaulaton i, ai hangoluan nuaeng nang sogot dibagabagahon.
HATORANGAN :
Godang do turiturian na so gabeak dohot na so marnosan jumpangta di ngolu on. Ramalan nasib, ramalan bintang, gambaran rupani angka turiturian na so hinalomohon ni Debata. Mangido gogo sian ulpuhan ni datu manang mamangke “susuk” di angka horong parompuan na naeng tampil bagak manang uli, tong do sarupa, gambaran ni turiturian na so hinalomohon ni Debata. Na pasti, boi do i idaon satongkin songon na uli manang marguna, alai diujungna luhutna do mangido korban. Marhite turpuk on, asa dao jala boi tolap mangadopi sisongon i, tangkas do asa tangkas ma hita “marhadaulaton” manang didok di hata Indonesia “beribadah”. Jala ndang holan intap ni i, naeng do tangkas ulaon na marhadaulaton i, gabe hasomalan na denggan. Ala molo tung somal gabe tolap do, ala bisa karena biasa, dohot pandohan na mandok “pasomalsomal ma dirim tu hadaulaton”. Asa hatiha tapasomalsomal marhadautaon – beribadah, tontu parjumpanganta be dohot Debata marhite HataNa nunga tangkas jala teratur. Na boi gabe jaminan, hombar tu turpuk on, ima “bagabaga” hasonangan do dapot hita diujungna. Hasonangan di banua tonga on nuaeng dohot hasonangan banua ginjang hasuan. Hombar tu panghirimonta i. Amen.

TURPUK : 2 KRONIKA 30 : 8
On pe, sai unang ma patangkang hamu tangkuhukmuna i, songon na binahen ni ompumuna, pasahat hamu tagonan dirimuna tu Jahowa, jala ro be hamu tu habadiaonna, naung pinarbadiaanna ro di salelenglelengna, jala oloi hamu Jahowa, Debatamuna i, asa mundar sian hamu parpiarpiar ni rimasna.
HATORANGAN :
Adong sada keunikan na boi taida sian bangso Israel manjalo haluaon marhite sejarah karta keselamatan na di patupa Jahowa tu nasida. Di sada tingki mangoloi do nasida tu Jahowa, di sada tingki na asing muse, dipatangkang bangso i do rohana mangoloi Jahowa, jala na parohon uhum ni Debata na mangonai tu nasida. Alai dung mangangguhi bangso i tu Debata manopoti angka dosa dohot hasalaon nasida, tongtong do marpangulahi roha ni Jahowa mida bangsoNa i. I do gambaran parjolo naeng tangkas idaonta sian unok ni turpuk on. Jala hombar tusi ma, diuduti turpuk on do, sipaingot secara khusus tu sundut na umposo, asa unang be manimbil sian dalan ni Jahowa, songon na jotjot diula ompunasida, na sai olo manimbil tu siamun dohot tu hambirang. Ala na badia do Jahowa, ingkon badia do nang siihuthon Ibana. Holan sada do Debata sioloonta, ima Debata na badia, na gogo, na marhuaso di saluhut na tinompa. Nuaeng pe ingkon taokuhon do di ganup pardalanan ni ngolunta, boi jala tolap hita margogo, mangadopi saluhutna i, holan ala asi ni rohaNa do. Antong tapasolhot ma dirinta tu Ibana marhite panombaon na sintong, ima marhite na mamelehon dirinta gabe hasangapon ni GoarNa. Ai sian Ibana do saluhutna ro, marhitehite Ibana jala marhapatean tu Ibana do sasudena, di Ibana ma hasangapon saleleng ni lelengna. Amen.

TURPUK : JOHANNES 4 : 23
Alai na ro ma tingkina jala nunga ro i nuaeng, gabe di bagasan Tondi dohot hasintongan martangiang angka partangiang na tutu tu Ama i; ai angka partangiang na songon i dipangido Ama i.
HATORANGAN :
Tangiang ima hosa hangoluan ni na porsea. Ra pandohan i, ndang be asing i di hita. Alai boha do martangiang jala songon diado martangiang, naeng tangkas pabotohonon ni turpuk sadari on. Adong tahe tangiang na so sintong? Adong. Ima molo martangiang holan mangasahon pingkiran dohot laho patimbohon diri. Isarana, halak Parise na martangiang di tongan dalan, asa dibereng halak ibana na martangiang i. Martangiang ima pangalaho manomba Debata na badia i, alani ingkon dibagasan hasintongan do hita laho marsomba tu Ibana. Di jaman na maju nuaeng on, nunga godang di lului jolma angka panombaon manang partangiangan na laho pasonangkon diri, patabotabo pinggol sambing, tarlumobi ma i angka sundut na umposo, sai naeng mangalului ibadah-ibadah alternatif. Adong muse partangiangan i holan seremonial manang kebiasaan sambing. Hape didok Tuhan Jesus do tu hita na porsea di Ibana, asa muba rohanta martangiang manang manomba Ibana. Asa boi hita martangiang dibagasan Tondi dohot hasintongan. Ndang dibagasan pardagingon be panombaonta dohot partangianganta i. Boasa ingkon martangiang dibagasan Tondi? Ala Tondi do Debata, asa angka na martangiang tu Ibana, patut martangiang dibagasan Tondi dohot hasintongan. Antong tajalo ma Tondi na sian Tuhan i, asa margogo hita martangiang hombar tu lomo ni rohaNa i. Amen.

TURPUK : LUKAS 4 : 8 B
Tuhan Debatam do sombaonmu, sasada Ibana do sioloanmu!"

HATORANGAN :
Turpukta sadari on ima tingki pangunjunan na dipatupa sibolis tu Tuhan Jesus, dung marpuaso Ibana 40 ari 40 borngin lelengna. Ro do sibolis mamboan Tuhan Jesus laho marnida haulion dohot harajaon ni portibi on, jala didok sibolis i ma tu Ibana, “ Di Ho ma i saluhutna, anggo olo Ho marsomba tu ahu”, alai dialusi Jesus ma, songon turpuk on, “Tuhan Debatam do sisombaonmu, sasada Ibana do sioloanmu”.
Di parngoluan siganup ari, jotjot do taadopi angka pangunjunan na dipatupa sibolis laho mangelaela hita asa manimbil hita sian dalan ni Jahowa jala mangoloi sangkap ni sibolis i. boi do i marhite hamoraon, hagabeon dohot hasangapon na adong di portibi on. Olo do margabus halak asa dapotan pangomoan ibana, olo do manogok (suap) asa dapotan ibana sadasada jabatan, olo do laho rupani mangido gogo tu ulpuhan ni hadatuon, dohot lan angka na asing pangalaho na boi hita mandao sian Tuhan i. Ima deba piga dalan na binahen ni sibolis laho mangunjuni hita. Hape tung tangkas do dipabotohon hata ni Tuhanta, ianggo hasangapon, hamoraon dohot hagabeon na sian portibi on, parsatongkinan do i. Alai na tangkas manontong ro di saleleng ni lelengna ima harajaon na sian banua ginjang i. Alani i, asa dohot hita gabe parjambar tu harajaonNa i, ingkon holan Ibana do sombaonta dohot oloanta, ndang adong na asing. Ai Ibana do nampuna harajaon dohot hagogoon ro di hasangapon si saleleng ni lelengna i. Amen.

TURPUK : 5 MUSA 10 : 12
Nuaeng pe, ale Israel, aha do na pinangido ni Jahowa, Debatam sian ho, nda asal marhabiaran ho tu Jahowa, Debatam, jala marparange ho di saluhut dalanna, huhut marroha haholongon mida Ibana dohot mangoloi Jahowa, Debatam sian nasa roham dohot sian nasa ateatem!
HATORANGAN :
“Holong”, on ma pandohan na somal tabege jala sai jotjot rupani dijamitahon angka parjamita songon karekter khusus (specially character) ni halak Kristen siihuthon Kristus. Tuhan Jesus mandok ingkon haholongan Debata jala habiaran. Dipadomu do hata “holong” dohot hata ”biar”. Parholong do Debata jala parrimas. Taantusi holong, ala naung parjolo do Debata manghaholongi hita. Jala molo ndang tahangoluhon holong, olo do ro rimas ni Debata manguhumi hita. Jadi ingkon mabiar do hita disi, unang sanga ro rimas ni Debata. Ai molo ro rimas ni Debata, ndang haotapan hita i marhite malonta, dohot gogonta, ingkon mago do hita. Alai molo masa do holong di hita, lam idaonta do holong ni Debata dohot asi ni rohaNa di hita, na gabe malua hita sian ihotihot ni sibolis jala boi tubu panghirimon di hangoluan na saleleng ni lelengna i. Songon i ma turpuk sadari on naeng paingothon hita, boha do hita na mangoku porsea di Tuhan i, naeng tangkas manghangoluhon holong songon na pinangido ni Debata sian ganup na porsea di Ibana. Hatiha tangkas hita manghaholongi dongan songon diriniba sandiri, manghaholongi musu songon diriniba, songon i naeng tangkas patuduhonta. Jala marhite i, boi ma tangkas taantusi holong ni Debata na so hasuhatan di ngolu on. Antong patut ma hita manghaholongi jala mabiar tu Debata, asa ngolunta pe tandi jala tanda patuduhon siihuthon Kristus hita di portibi on. Amen.

TURPUK : JAKOBUS 1 : 27
On do hadaulaton na ias jala na so marlindang, di roha ni Debata Ama: Mandulo angka na so marama, so marina dohot angka na mabalu di haporsuhonnasida, huhut mangaramoti diriniba maralohon portibi on, unang marlindang.
HATORANGAN :
Denggan do angka na pasauthon angka ruhutruhut ni parugamaon, alai naeng dibagasan ni i sudena ndada lao pasintonghon diri manang patuduhon siula parugamoon hita disi alai si pasaut lomo ni roha ni Debata ma. Marisuang do angka praktek parugamoon na tabahen i molo ndang mampanghorhon i tu angka pangalaho na pangoluhon. Joujou gabe pasupasu ima na sai tongtong marsaringar di angka na porsea siganup ari. Mardiakonia ma Huria, ala Jesus mandok tu hita asa gabe siula misi ni Debata jala sitindangi ni Debata do hita (bdn. Mat. 28: 19-20). Molo tanggap na jonok do hita tu Debata, sai taradoti ma angka na denggan i dibagasan ngolunta. Unang ma talu hita mangulahon na denggan (bdn. Roma 12:21). Sai rade ma hita sibahen angka haimbaruon na hombar tu lomo ni roha ni Debata dibagasan pos ni roha nang asi ni roha ni Debata. Ai, sai donganNa do hita laho patupahon saluhutna i. Disisi na asing sian hangoluan si saonari, ima gok angka donganta na gale na mengalami ketidakadilan sian angka halak na gogo na mangulahon ketidakadilan. Kritik na tumajom ima, gareja hurang mangalehon roha tu ngolu ni angka sosial ni ruasna jala angka persoalan sosial digareja holan sebatas panghataion dope gumodangan. Ala sai panghobasion seremonial dope na diutamahon gareja i. Alani i, sahalak na nunga berpuasa ingkon adong ma nian hamubaon ni diri dohot parubahan ni ngolu tu lam dumenggan. Mardiakonia ma huria molo dung marpuasa, boi mangulahon na hombar tu lomo ni roha ni Debata. Amen.

TURPUK : ULAON NI APOSTEL 20 : 35
Sandok hupatuduhon tu hamu, ingkon songon i do iba mulaulaon laho mangurupi angka na so margellok, marningot hata ni Tuhan Jesus, ai Ibana do mandok: "Martuaan do na mangalehon sian na manjalo!"
HATORANGAN :
“Holitholit mago, buangbuang ganda”, pandohan ni halak Batak do on, na boi dilapati tu mago na do halak na sai mangholit artana maradophon angka donganna, jala lam tu ganda na do disadasada halak nang pe sai songon na mambuang ibana di artana maradophon dongan na dina marsilehonlehon i. Jala saurdot do on tu Hata ni Tuhanta na mandok di Poda 11 : 24 “Adong deba halak na buas manaburhon, hape lam ganda do, adong huhut deba mangkolit hamoraonna, hape lam marpogospogos do.” Songon i ma nang turpuk on, naeng paingothon angka na porsea di Tuhan i, ianggo hamoraon na tajalo i sian Debata do mualna, ala ni naeng tangkas do lehononta i tu angka halak/dongan na memang tangkas siurupan. Ala hata martua di turpuk on tung tangkas do dipasahat jala dipatolhas tu halak na ringgas marsilehonlehon sian hamoraonna i. I do na tanda pangarajumion na sian Debata jinalona hamoraon i. Jala tung tangkas do i, anggo dibagasan hamoraon manang na adong di hita i, adong do sangkap ni Debata naeng tangkas patulushonta. Alani tabotoma marsilehonlehon tarlumobi tu angka na gale, disi do botoonta sangkap ni Debata na masa marhitehite arta dohot ngolunta i. Amen.

TURPUK : ROM 12 : 13
Antoi hamu ma na hasea di angka na badia! Haringkothon hamu ma partamueon!
HATORANGAN :
“Paramak na so ra balun, partataring na so ra mintop, parsangkalan na so ra mahiang”, ima dasor/ prinsip partamueon ni halak Batak. Poda on sai dipodahon natuatua tu angka sundut na umposo asa sai tongtong rade amak hundulan ni angka na ro tu bagasta, manghobasi sipanganon na boi panganon ni tamue.
Jala marhite turpuk on, naeng tangkas, partamueon i diulahon ala mangasahon jala patupahon i ala ni holong ni Tuhan i na naung tajalo. Ai marhite partamueon na tangkas boi, do botoonta kadar ni ngolunta, manghamauliatehon denggan basa ni Tuhan i, ala jotjot do i so sian panagamonta.
Di tonga ni pangalaho ni torop jolma na holan sumarihon diri dohot na ringkot di dirinabe, naeng hehe ma ruas dohot parhalado ni huria mangaramothon partamueon di tonga keluarga, asa angka na ro mangebati bagasta, huta manang luatta ndang mabiar siala na so adong na sumarihon nasida. Halak dagang, pangaranto dohot na sarombang tusi tajangkon dibagasan partamueon na denggan. Ala di surat Heber tung tangkas do didok “ Unang halanggushon hamu partamueon; ai marhite sian i hea do ditamuei halak angka surusuruan, so sian pamotoanna (Heber 13 : 2). Alani tangkas ma hita manghangoluhon i songon tandanta manghaposi Tuhan i di ngolunta ganup ari. Amen.

TURPUK : 3 MUSA 23 : 22
Molo digotil hamu parbue ni tanomuna, ndang jadi suda gotilonmuna duru ni haumamu, jala ndang jadi suda jomputonmu na marpisikpisik di panabianmuna, ingkon tinggalhononmu do i di halak na pogos dohot di halak dagang; ai Ahu do Jahowa, Debatamuna i.
HATORANGAN :
Pesta gotilon ima sada pesta las ni roha ni halak na naung simpul manghalashon parbue ni hauma dohot ladangna. Alai hatiha ulaon las ni roha on dipatupa, naeng do tangkas pandohan ni BE 373 “mangula hita jolma manabur boni i, alai anggo jadina di Debata do i” na marlapatan Debata do na mangaramoti huhut pasauthon tulus angka na tasuan di ganup hauma dohot ladangta i, alani tangkas do pasahatonta patumonaan ni na taula i tu adopan ni Debata ala sian Debata do i. Laos marhite angka na naung tajalo i sian Debata, i do muse pangkeonta laho patupahon ulaon asi ni roha di angka na patut siasian. Tapargunahon ma na patut di ngolunta jala unang sanga marlobilobi (ambolong so marlapatan). Tapasahat ma tu Debata na patut sipasahatonta, unang taparsoada angka na naung tajalo sian Debata.
Tangkas ma naeng dohonon ni turpuk on, marhite hita na naung manghilala denggan basa ni Tuhan i, asa tangkas hita mangurupi dongan na gale dohot na patut siurupon. Sosososo na pinasahat ni Debata marhite turpuk songon kewajiban ni na porsea do asa tung tangkas mangurupi na mauas dohot na gale, asa tung sude na tinompa Debata do marmuduhon ngolunta. Amen.

TURPUK : GALATIA 6 : 2
Masiurupan ma hamu mamorsan angka na dokdok i; i ma dalan mangaradoti patik ni Kristus.
HATORANGAN :
Adong pandohan na mandok “berat sama dipikul ringan sama dijingjing”. Sintong do tutu pandohan i, boha pe borat ni angka siulaon molo adong do kerjasama (masiurupan) tulus do ulaon i dohot dengan jala neang. Jala i do naeng tangkas hangoluhonta sian turpuk sadari on, ima masiurupan (kerjasama). Ala masiurupan ima dalan mengaradoti patik ni Kristus. Boasa ? Songon halak siihuthon Kristus (Kristen), lam jonok hita tu Tuhan i lam jonok do tong angka hamaolon (tantangan iman) na ingkon siadopanta, songon HataNa na mandok “ndang tarbahen gabe siseanHu halak, na so manuhuk silang na tu ibana, laho mangihuthon Ahu”. Alai atik pe songon i rupani borat ni tantangan dohot angka pangunjunan, ndang loason ni Debata, jolma i sahalakna sandiri, ai didok do “ Sai na donganKu do hamu, rasirasa ro ajal ni hasiangan on”. Ai sai na adong do patupaon ni Debata pangurupion sian angka na porsea na asing. Jala muse ndang loasonna boti, ndang margogo hita mangadopi pangunjunan i, ai sai na paradeon ni Debata do angka na porsea na asing laho mangurupi hita. Jala memang pangunjunan i, ndang pasahathon ni Debata, so sian tolap ni gogonta (jaha 1 Korint 10:13). Alani marhite turpuk on, naeng tangkas hita masiurupan di angka na porsea di Goar ni Tuhan i, laho mangurupi dongan na tongon mangadopi hamaolon, ai dipangke Debata do hita gabe ulaulaNa. Amen.

TURPUK : HEBER 13 : 16
Alai unang ma lupa hamu, mambahen na denggan dohot mangulahon asi ni roha; ai dihalomohon Debata do angka pelean na songon i.
HATORANGAN :
Marasing di buku Heber on sian na asing, ala ndang marrumanghon surat alai marrumanghon jamita na ganjang di na dialamathon tu sude halak Kristen na porsea, jala pangondolan ni jamita i ima taringot tu Jesus Anak ni Debata. Jesus i ma malim na bolon na pinabangkit ni Debata ro di salelengnilelengna, jala dipasahat AmaNa I do hamalimon dibagasan haunduhon dohot pangoloion na sinangkapan ni Debata. Dipasahat do diriNa gabe pelean na sintong i ma na mamorsan dosa ni jolma di portibi on. Jotjot do tabege hata ni angka dongan mandok “ai holan di ujung ni ngoluniba pe binoto pasahathon diri tu Debata, ai tong do sahat i tu hasonangan i“. Godang do hita na naeng pasobokhon dirina, gabe sarombang dohot parjahat na marhamubaon ni roha songon parjahat na disamping ni Jesus di tingki tarpajal. Asi ni roha ni Debata i ma parbue ni holong, ala holong do rohana diangka na tinompaNa, alai ndang sai tarbahen ni jolma songon holong ni Jesus Kristus ala godang dope mian di ateate ni jolma holong na so marasi ni roha. Tuhanta Jesus Kristus dipelehon do diriNa homongkop angka dosa ni jolma, alai adong do na so ra roha na maniru pambahenan ni Jesus na olo pasahathon diriNa tu hamatean. Dison do disosoi turpuk on hita taparade rohanta mangalehon pangurupion tu angka dongan na tahaholongi, ulaon sisongon i do na pahinsathon haporseaon dohot pahehehon dongan asa lam mura mangantusi angka ulaonna. Marhite angka ulaon na memberi dohot manerima i ma sada ulaon na hinalomohon ni Debata, ai marhite i do diboto Debata beha do sasintong na hadirionta di angka na masihaholongan, na parjolo didok ndang ala ni balga ni sibahenon i, alai roha i do na pasahathon angka pelean na arga i do dibereng Debata. Antong di hamu angka dongan panjaha, gabe parholong ni roha ma hamu tu angka dongan na humaliang hita marhite si songon i do lam hinsat angka partondion ni jolma diboto paturehon hadirionna, asa jumpang tu ngolu na imbaru. A m e n

TURPUK : 2 KORINT 9 : 12
Ai ndada, asal dipatuk ulaon guguan on hahurangan ni angka na badia i; na sumurung do i huhut, ala ni hamauliateon ni na torop tu Debata.

HATORANGAN :
Dina lam torop huria i jongjong jala dina lam porlu angka pangurupion tu angka haporluan ni huria na marsadasada disi ma Apostel Paulus manongos surat on tu angka huria na rade rohana manumpahi huria na adong di Jerusalem. Huria na situmpahan i, i ma na dibagasan hapogoson, na so mardihadiha. Mangurupi angka na badia i ma mangalehon na ringkot tu angka dongan Kristen, angka na badia i ma angka bangso ni Debata naung gabe siihuthon Jesus. Dibahen Apostel Paulus do huria na di Korint gabe sada huria tiruan tu angka huria na marsadasada. Sada sitiruonta sian i ima harenteon nasida manumpahi angka huria na naeng situmpahan. Adong do hasurungan ni na marsilehonlehon tu Huria. I ma, ia silehonlehon tu huria i hamauliateon tu Debata do. Sumurung do silehonlehon na songon i, ai molo na songon i ndada na tu halak na asing, alai dohot do tu dirina, songon i dohot tu Debata. Ala ni patut do rajuman gabe sada guguan, jala ndang ala ni paksaan alai sian dirina sandiri do i, I ma parbue ni haporseaon manang hamauliateon tu Debata. Nunga tahangoluhon marsiurupan, alai unang ma alani na marsiadapari, patut do hita mangurupi angka donganta asa malua sian haotoon, ala dasor di pangurupion i do holong ni roha. Rajuman ni rohanta do ia na tapasahat tu huria i ma pelean hamauliateon tu Debata jala ndang jais rohanta disi, jala ingkon sian ias ni rohanta do mangalehon manang manumpahisa. Alani patut paradeonta rohanta dohot gogonta tu Debata marhite huria i. Tugas jala tanggungjawab ni na porsea do marsibasabasa, ai pasupasu ni Debata do na tapasahat i. Molo dipasupasu Debata hita asa habaoran ni pasupasu hita tu donganta “Hupasupasu pe ho, asa gabe pasupasu do ho” (I Musa 12). Amen

TURPUK : ULAON NI APOSTEL 1 : 8 B
Gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on.
HATORANGAN :
Pangalaho na so tarsirang do hatutubu dohot haroro ni tondi parbadia, ia hatutubuNa i ma pamungkaonna, haroroNa i ma hasunanna (hagogokna). Singkop ma ulaon panghophopon ni Tuhan Yesus pinatupaNa i marhite hamamateNa dohot haheheonNa dung i dipatupa i manaek ma Ibana tu banua ginjang. Sai tong tu haportibion laho roha dohot pangkirimon ni angka sisean I sai dihirim roha nasida dope hajojong-jong ni sada harajaon sipajongjongon ni Tuhan Jesus diportibion. Alai dipasintong Tuhan Yesus do pangkirimon nasida jala dipatimbo, dipabidang na ingkon siranapon nasida, lapatan na harajaon na andul umbolon, tumimbo jala umbidang do nanaeng sipajongjongon ni Tuhan Jesus, ai dang holan di Israel harajaon I, disandok portibion do. Hananaek ni Tuhan Jesus tu banua ginjang I ma pasalpuhon haporsuhon naung tinaonNa I do I, nungga sun di ula Ibana sude ulaonNa, patupahon haluaon tusaluhut namanghaporseai Ibana. Mangalehon gogo haporseaon do I di angka jolma naporsea mardongan habengeton mamaritahon barita nauli.Hamumulakna tu hasanganponNa do hananaekNai,manaek tu banua ginjang tu siamun ni Debata Ama, tu ginjang ni harajaon dohot huaso.Herbang do tanganNa di natarhissat I Ibana jala dang boi be di ida mata, alai sai tontong do Ibana mamasumasu hita, ala ni do unang namarnaloja hita jala mandate rohanta dipangaradotion ni ulaon napinasahatNai. Hita do parhobas diharajaonNa, siradotan jala siharingkothonon do ulaon I, tondi parbadia do napatauhon hita tu ulaon I, sijaloonta do tondi parbadia I marhite haradeon ta dohot kesetiaan ta mangaradoti hata/tonaNa.Alani rade ma hita manghirim jala tagam diharoroNa I laho mangalap angka nabadia asa naposo haposan hita diangka ulaon parsuruon i.. Amen.

TURPUK : 2 TIMOTEUS 4 : 2
Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion.
HATORANGAN :
Adong do hata na mandok: Banyak berbuat adalah pahala, banyak berbual adalah petaka. On ma na godang tarida di tingki on di angka parjamita. Boasa? ingkon godang nama mangkatai “berbual” asa didok na jago, na malo jala parsaor, lumobi ma molo na ni donganan na i na mora manang disegani di luat i gabe godang ma dapot silehonlehon. Manang tadok ma mammon nama gumodang dipingkiran ni angka parjamita gabe gumodang na lupa di poda Tohonan naung jinalona ala nunga boi be diatur dohot mamon jala mabiar hinorhon ni angka silehonlehon naung jinalona. Turpukta sadarion paingothon hita angka parhalado naung pinillit ni Debata asa ingot hita dipoda Tohonan naung tajalo, ingkon barani manghajongjonghon Hata ni Debata di ganup tingki molo sala tadok sala songon i nang sebalikna. Songon i do na adong di sada Huria ala so hea dipinsang angka ruas ni huria ala ni ulaonna na salah, mansoadahon RPP dohot aturan-aturan ni Huria gabe marlomolomo ma angka ruas di angka ulaon na so tama. Parmahan ingkon barani manghajongjonghon habonaron di ganup tingki tung aha pe na masa jala marhitehite habonaron i ingkon rade mamodai dibagasan lambas ni roha. Barani mangadopi tantangan, siap manjalo uhuman, ndang mandele jala manabunihon angka na humurang, i do hataridaan ni anak ni Debata naung manjalo ngolu na imbaru. Taingot ma hata ni Debata namandok: ”unang hamu pangoloi di mata, songon namambuat roha ni jolma, songon naposo ni Kristus ma ulahon
hamu roha ni Debata, sian nasa roha muna”. Amen
TURPUK : 1 TESSALONIK 2 : 2
Ai dung jolo huta on hami na marporsuk dohot na marsipal di huta Pilippi (songon na binotomuna), dapotan hiras ni roha do hami mangasahon Debatanami laho mangkatahon tu hamu barita na uli na sian Debata, nang pe godang paraloon
HATORANGAN :
Sada ulaon na mansai borat do dihadirion ni jolma molo olo ibana manaon di haporsuhon lumobi mamaritahon barita nauli. Jarang do jolma olo susaan dirina laho mamboan hasintongan ni Goar ni Debata. Mat 5 : 10 mandok: ”martua do jolma napinaburuburu ni halak ala ni hatigoran, ai di nasida do harajaon banua ginjang”. Tangkas do dihatahon Apostel Paulus asa holan Debata sambing ma na tapangasahon di gulmit ni ngolunta, lumobi mambaritahon Barita Nauli. Marragam do angka cara na binahen ni parbarita nauli lumobi di partingkian sisaonnari on. Na bermissi pasahathon Hata ni Debata, ingkon do marhitehite pangidoan na serep marroha, unduk manjalo hiras ni roha, asa margogo jala barani hita manjamitahon Hata i, dijolo ni angka na so marhaporseaon tu Jesus. Ingkon barani do hita manghatindanghon Jesus i di hadirion ni jolma angka pardosa. Asa pos rohanta, ulaon na borat i sai diramoti, dipasu-pasu Debata do i. dibagabagahon do haluaon molo Debata tahaposi marhite Jesus Kristus . Didok Apostel Paulus do di Rom 8 : 31 “molo Debata donganta ise be alonta ?” Antong tatangkasi ma dirinta ise do na tahaposi di portibi on? Molo Debata do, dapotan ma hita di hiras ni roha, alai molo di dirinta do hamagoan ma jaloonta. Amen.

TURPUK : MATEUS 10 : 7
Alai borhat ma hamu mamaritahon hata on: Nunga songgop harajaon banua ginjang i!
HATORANGAN :

Ndang hea dipasombu Jesus angka na sinuruNa borhat boti, so padohot pandonganionNa. Jala andorang so dipaborhat Jesus angka siseanNa i, nunga jumolo diajari nasida, asa diboto angka dia ma na naeng siulaon jala sitagamon nasida na naeng masa. Angka tehnis ni ulaon pe dipabotohon Jesus do songon na tarsurat di Matius 10 :16 “Hu suru do hamu songon biru-biru tu tonga-tonga ni angka babiat, dibahen i pantas ma hamu maroha songon ulok, huhut lidang ma rohamuna songon darapati”. Asing sian i dilehon Jesus do tongtong sahala asa margogo nasida mangalo angka tondi na hodar jala patupa ulaon hombar tu parsuru ni Jesus. Antong aha do na naeng baritahonon nasida? I ma : ”Nunga songgop harajaon banua ginjang i” na marlapatan nunga songgop harajaon ni Debata. Harajaon ni Debata naung songgop i marlapatan do i tingki nauli nunga songgop, tingki ni Tuhan i manaluhon harajaon ni sibolis di portibi on. Tingki nauli i ima silehonlehon ni Tuhan i, asa marhite sian i naeng ma ringkot ganup jolma paradehon dirina tu hamubaon huhut porsea dipambahenan ni Debata. Hita do siboan Barita Nauli ditingki on asa ndang jadi “opini” manang pandangan ni dirinta sandiri sipasahatonta alai ingkon naung tajalo sian Ibana do. Antong tapajolo ma Debata na marsuru hita. Amen

TURPUK : JOHANNES 15 : 26 – 27
Asa ro ma Pangondian i sisuruonku sian Ama i tu hamu, i ma Tondi hasintongan i, na borhat sian Damang; I do na mangkatindangkon taringot tu Ahu. Alai dohot ma hamu mangkatindangkon, ai donganku do hamu sian mulana i.
HATORANGAN :
Ndang adong alasan di ganup na porsea so manghatindanghon Tuhan Jesus di bagasan ngoluna. I do sada ulaon pinasahat ni Tuhan Jesus tu hita, jala tumangkas ulaon i dipasahat tu hita marhite huria i ditingki manghatindanghon haporsean hita.
Molo dipangido Tuhan Jesus hita manindangi taringot tu Ibana, ima patuduhon naung tangkas tatanda Ibana, tangkas tapangkilalahon angka pambahenanNa di bagasan ngolunta. Hurang sintong do panindangion molo so ala panandaon di Tuhan i dohot pamangkilalahononhon di angka pambahenanNa di ngolunta.
Umbagas jala umbalga sian i ma pangulaon ni Tondi Parbadia i na sinuru ni Ama i sian banuaginjang naung manghatindangon taringot tu Ibana. Alani molo Tondi Parbadia na sian Banuaginjang manghatindanghon Ibana nda patut ma hita ingkon manghatindangkon Ibana? Jolma na so olo manghatindanghon Jesus dingoluna, ima na so mangargahon panjouon dohot pamiliton ni Debata tu dirina, na so manghilalaon dohot mananda pambahenan ni Debata dingoluna. Molo tahatindanghon Tuhanta i, ndada holan mangatupi parenta hita disi, alai na maniru pngulaon ni Tondi Parbadia ido hita disi. Dibahen i hatindangkon ma Tuhan i disandok gulmit ni ngolum. Amen

TURPUK : MARKUS 8 : 35
Ai na naeng paluahon hosana, mangagohonsa do; alai na agoan hosa ala ni Ahu dohot ala ni barita na uli i, i do paluahonsa.
HATORANGAN :
Adong do hata Batak mandok: Nirimpu parhunian hape pargadongan, nirimpu parsaulian hape hamagoan. Pandohan on pataridahon pangalaho, pambahenan na sala memprediksi di parbue dohot hasil na naeng sibuaton manang sijaloon.
Hombar tu pandohan i ma dipaingot turpuk on hita asa unang sala hita mambahen ojahan (dasor) ni ngolunta. Torop do halak naung mangojakhon (mandasorhon) ngoluna tu angka pasupasu ni Debata na jinalona manang na niluluanna (isara ni arta, pangkat, sinamot, ilmu dohot na asing), ndada be tu silehon pasupasuu i. Pangalaho on do na pininsang ni Tuhan Jesus tu halak na mora naung yakin bahwa marhite arta na pinapunguna boi lestari ngoluna, umbahen didok: Ale tondingku, nunga rade godang artam, sae manang piga taon on. Ipe marhasonangan ma ho, mangan minum ma ho, las ma roham. Alai ninna Debata ma mandok ibana: E, ho na loahon i saborngin on tungguon ma hosam sian ho. Ima na pinarademi, tu ise ma i? (Lukas 12:19-20).
Marhite i dipaingot do hita, asa tabahen holan Jesus do na gabe ojahan ni ngolunta. Molo Jesus gabe ojahan ni ngolunta, mangolu ma hita. Alai molo asing sian Ibana diujungna mago jala mate ma hita. Molo dilehon Debata angka pasupasu (hamoraon, hagabeon, hasangapon) tu hita dalanta (sipangkeonta) ma i laho mangalului, mangihuthon, manghaporseai Tuhanta i. Unang sala bahen ojahan ni ngolum. Amen

TURPUK : LUKAS 12 : 23
Ai ummangat do hosa sian sipanganon jala sumurung do daging sian parabiton.
HATORANGAN :
Jotjot do tajaha disurat kabar manang tabege marhite siaran sian televisi adong halak na mamunu donganna holan ala ni sipanganon, ala ni arta manang ala ni hepeng. Angka halak sisongon on termasuk do i jolma na mambahen angka materi ummangat (ummarga) sian hosa (ngolu) ni jolma, manang jolma na sai holsoan jala na so porsea dipanarihon ni Debata dingoluna.
Jolma sisongon on ima halak na mangarimpu molo nunga rade sipanganon, siinumon, parabiton nunga boi i manontuhon keberadaan ni parngoluon i. Lupa ibana bahwa ngolunta saguru di Ibana (Tuhan) silehon ngolu i.
Halak na mambahen arta, sinamot, sipanganon, parabiton manang arta na di portibi on, ummarga sian hosa, pamatang nang ngolu on, ima halak na so manjaga dirina, na so mangargai dirna dohot ngoluna, jala ndang arga disi nang ngolu (hosa) ni donganna. Ndang mabiar ibana laho patupa kekerasan bahkan mamunu (mambuat hosa ni) donganna.
Molo didok diturpuk: “Ai ummangat dohosa sian sipanganon, jala sumurung do daging sian parabiton.” Laho mangajari dohot paingothon hita do i asa taargai ngollu ma ni lehon ni Debata. Molo arga di hita ngolu na nilehon ni Debata jagaan do i marhitehite pasupasu (sipanganon, siinumon, parabiton dohot angka na asing) na nilehon ni Debata. Amen

TURPUK : 1 TESSALONIK 4 : 13 – 14
Alai naeng ma tangkas botoonmuna, ale angka dongan, taringot tu angka naung monding i, asa unang marsak hamu, songon angka na leban, na so marpangkirimon. Ai molo porsea hita, naung mate Jesus dohot hehe, sandok togihonon ni Debata do rap dohot Jesus nang angka naung monding marhitehite Ibana.
HATORANGAN :
Masuk ma hita tu ujung taon parhuriaon, jala dungkon i masuk ma hita tu mingguminggu ADVENT, bagabaga haroro ni sipalua Jesus Kristus. Di minggu on diganup huria dijahahon ma goar-goar ni angka na monding selama na sataon on. Dibohali hata ni Debata do hita di minggu ujung taon parhuriaon on, i ma asa tangkas ma botoonta taringot tu angka na monding, unang be marsak hita marningot i (molo adong sian tongatonga ni keluarganta na monding). Alai naeng ma hita marpangkirimon, porsea tu Tuhan Jesus ala naung mate Ibana jala hehe. Taingot ma Tuhan Jesus Kristus do hangoluan dohot haheheon (Joh.11:25-26) jala ganup na mangolu jala na porsea tu Ibana, na so tupa mate ibana salelenglelengna.
Hamatean na nidok ni Jesus ndada hamatean di pardagingon alai lobi sian i, hamatean ni dosa do naeng dohononNa. Na porsea di Ibana mate dipardagingon, alai mangolu do di Tuhan Jesus. Saleleng mangolu hita mansai godang do angka masalah na taadopi. Haporseaonta jojot diuji Debata, olat ni dia do hita mampu berjuang mangalo dosa. Manang ise na monang maralohon dosa hangoluan salelenglelengna i ma jambarna. Ala ni i tapaimbaru ma dirinta, tapauba pangalahonta, jala porsea ma hita tu Debata. Hamatean i do dalanta pajumpang dohot Debata molo dung monang hita maralohon dosa portibi on. Amen

TURPUK : LUKAS 12 : 35
Sai hohos ma gontingmuna, jala galak ma palitomuna!
HATORANGAN :
Roha haimbaruon, i do na dihalomohon ni Debata sian hita jolma na tinompaNa. “Dungo ma hamu” dipaingot hita diturpuk sadari on ; 1. Hohos ma gontingmuna. Hohos (ikat pinggang) mansai godang do na mamangkeon, tujuanna asa unang longgar pahean na pinangkena, asa gomos jala asa uli idaon. I do dipangido Debata asa tapangke hohos na sian Debata, Ibana hasintongan dohot habonaran marhite haporseaonta. Unang be kendor haporseaonta tu Tuhan Jesus Kristus alai lam marsihohot ma asa boi hita maralohon parukilon, angka parsorion na di portibi on; 2.Galak ma palito muna. Molo didok palito, i ma inganan ni hatiuron (api), jala sude do mangharingkothon on. Lilin na memet mansai penting do i ditingki mate lampu, lilin na balga jala na uli ndang penting i di hita jolma di tingki suasana na torang, galak ma palitonta, gabe lilin na memet ma hita alai sude mangharingkothon. Na nidok disi, gabe pasu-pasu ma hita tu humaliang. Mamboan haholomon i tu hatiuron marhite palitonta. Tapagalak ma palitonta, tapatiur dalanta, ai torop dope na lilu asa sai hatop ma mulak i. Marsihohot tu Debata ma hita, manontong martangiang jala hatiuron dina holom. Asa songon na nidok ni Tuhan Jesus ”Hamu ma panondang ni portibi on”. Taulahon ma i marhjite ulaonta siganup ari, marhite parsaoranta tu dongan jolma dohot angka na tinompaNa tarlumobi ma tu Debata Amen

TURPUK : 2 TIMOTEUS 4 : 8
Diri nama di jolongku tumpal hatigoran, silehonon ni Tuhan, Paruhum na tigor i, di ari sogot i tu ahu; alai ndada holan tu ahu, tu saluhutna do tahe, angka na mangkaholongi hapataronna i.
HATORANGAN :
Molo laho hita tu sada inganan na so hea tadalani, ingkon talului do sada jabu ni keluarganta di huta i. pasti do talului jolma na umboto inganan i asa ibana patuduhon inganan na talului i. Songon i ma nang haporseaonta, dina mardalan hita di portibi on talului do Tuhan Jesus jala tabahen Ibana dijolonta. Asa marhite Ibana patar ma saluhutna pardalananta. Ala Ibana do paruhum na tigor jala sian Ibana do tumpal hangoluan i. Tu saluhut angka na mangkaholongi Ibana dipatuduhon hapataranNa, I ma ngolu na salelenglelengna. Molo naung porsea hita tadok ma “Huboto do Tuhan tangkas panoguonma diiringiring Ho do langkangki, sahat ro diujung ni pardalanku”. Dipapatar Debata do taringot Kristus na tubu di portibi on na paluahon hita sian dosanta i ma dimingguminggu ADVENT.
Ala ni i rade ma hita paimahon Ibana sipalua hita jolma, mangolu dibagasan holong ni Kristus ma hita, marhaimbauruon. Debata do di jolongku tumpal hatigoran jala paruhum na tigor. Nunga rade ahu Tuhan ro ma Ho tu ngolungku. Amen

TURPUK : PSALM 31 : 6
Tubagasan tanganmu do hupasahat tondingku, nunga ditobus Ho ahu, ale Jahowa, Debata ni hasintongan i.
HATORANGAN :
Godang do jolma madabu tu bagasan pandelean, pola sahat tu na mago haporseaonna alani borat ni parungkilon na rongom tu ngoluna, hinorhon ni angka parsahiton, pangunjunan nang sian angka dongan na humaliang. Jotjot do jolma na mangadopi hamaolon i sala mamillit dalan sidalananna, ala parjolo gogona dipangasahon gabe madabu tu pangunjunan.
Alai marhite turpuk on dipangiot do hita angka na porsea asa parjolo ma tapasahat tu Debata sude na masa di ngolunta. Songon Parpsalm na pasahathon sude parungkilon dohot hamaolon na rongom tu ngoluna tu Debata di bagasan tangiang. Dipasahat Parpsalm sude na borat di ngoluna i tu Debata, alani haporseaonna tu Debata na sai tongtong manangihon jala mangalusi nasa alualu dohot tangiangna. Dirajumi ibana do paboa na partigor do Debata, na membela nasa perkara ni angka na bonar marroha maradophon musu. Pangarajumion tu haluaon na binahen ni Debata i ma na mangarahon Parpsalm manghatindanghon paboa na tongtong do satia Debata, jala holan sian Ibana do jumpang pangurupion.
Alani songon siihuthon Kristus hita, ndang tarsirang ngolunta sian angka parungkilon jala tusi do hita tarjou, manjalo bagian di sitaonon ni Tuhan Jesus naung manghophop hita sian dosa. Parungkilon dohot hamaolon i do siporsanonta hinorhon ni haporseaonta tu Tuhan Jesus. Di bagasan ni i taingot ma, nunga parjolo Ibana mamorsan sitaononta. Dibahen i holan sian Tuhan Jesus Kristus ma tajalo hagogoon asa margogo hita mamorsan nasa parungkilonta i, ai Ibana do nampuna ngolunta. Amen.

TURPUK : JESAYA 12 : 1
Jadi dohononmu ma di ari na sasada i: Mauliate ma ahu tu ho, ale Jahowa, ala dirimasi ho ahu, alai nunga marpamuati rimasmu, jala nunga diapuli ho ahu.
HATORANGAN :
Turpuk on pasahathon pujipujian (doksologi) tu hamuliaon ni Debata di sude sangkap dohot nasa pambahenanNa. Pamujion on dipasahat sian panandaon na tangkas di Debata, nang pe lalu rimas ni Debata tu bangsoNa alai tontong do marasi roha Ibana marnida na ni rimasanNa i marhite pambahenanNa na mangalehon haluaon dohot pangapulion. Pamujion on ima sada sikap na mansai uli sian pangarajumion di pambahenan ni Debata na mangonjar ibana mamuji di bagasan roha mauliate tu Debata.
Marhite i naeng ma tangkas botoonta, paboa parasi roha bolon do Debata lambat tarrimas. Sai marpamuati do rohaNa tu angka na olo mangauhon jala na olo porsea tu nasa pambahenaNa. Tagamon, hona uhum do nian hita ganup ala ni pardosaonta. Alai, ala umbalga do asi ni roha ni Debata sian rimasNa, gabe malua hita taruli di pangapulion sian Debata marhite haluaon i. Nuaeng holan Debata na ma hagogoon, panghirimon dohot hangoluon di hita.
Pardenggan basa do Debata naung mangontang hita minum sian aek hangoluan, na nilehonNa tu hita secara cumacuma, na so pola martuhor (Pat. Jes. 55:1). Antong, tapuji ma Debata pardenggan basa i, na mangalehon tu hita haluaon jala manglolu ma hita hombar tu haluaon naung tajalo i, asa marhite ngolunta tarjou nang dongan na humaliang hita mamuji Debatanta i. Amen

TURPUK : 5 MUSA 3 : 24
Ale Tuhan Jahowa! Nunga tutu dipungka Ho patuduhon tu naposom hatimbulonmu dohot tanganmu na gogoi; ai tung Debata dia ma di banua ginjang manang di tano on na tarbahensa patupahon songon jadijadianmi dohot songon hagogoonmi?
HATORANGAN :
Parsaoran na ronsot dohot Debata ndada holan mamboan jolma i tu bagasan ngolu na sonang taruli pasupasu dohot las ni roha, alai laos taruli do nang di panandaion na tangkas di Debata marhite na manghilalahon sude pambahenan ni Debata di ngoluna. Tarida ma i sian panindangion tu Debata, songon na di turpuk on. Asa holan sian panandaon na tangkas do marharoroan panindangion na songon i ; manghatindangkon hatimbulon ni Debata naung pinapatarNa di ngoluna. Alana, torop do jolma nuaeng na so haru mangargahon dohot manghilalahon be denggan basa dohot pambahenan ni Debata di tongatonga ni ngoluna. Ala memang ndang adong panandaon na tangkas di Debata. Manang aha pe na masa, pasupasu, las ni roha ndang tung dirajumi sian dia do harroan ni i. I do asa jotjot jolma i, sai mangasahon gogona di na mandalani parngoluonna siganup ari.
Asa marhite turpuk on dipaingot do hita na porsea di Jesus Kristus sipalua i paboa na holan Debata nama hagogoonta, ai Ibana do paluahon hita marhite tanganNa na gok huaso i. Na so tarjalo hita haluaon, na songon haluaonta nuaeng, sian manang ise pe, ia so holan sian Debata marhite Jesus Kristus. Alani, sai tahatindangkon ma hatimbulon ni Debata naung pinapatarNa tu hita di tongatonga ni parngoluonta siganup ari, jala holan tu Ibana ma hita marhapurusan di tonga ni ragam ni hamaolon na taadopi di ngolu on. Ndang adong Debata na songon Ibana. Amen.

TURPUK : HOSEA 3 : 5
Dung i di laonlaon ni ari mulak ma halak Israel, jala luluannasida ma Jahowa, Debatanasida i dohot * si Daud, rajanasida i jala angka hitir nasida * mandapothon Jahowa dohot hatuaonna di ujung ni angka ari.
HATORANGAN :
Taboto do ia halak na tarbuang ima halak na dao sian Debata ndang be Debata na mangarajai ngoluna, alai nunga be nasida mardalan hombar tu lomo ni rohana. Di tingki bangso i manuntun lomona gabe bangso na tarbuang do nasida jala gabe bangso hatoban do nasida. Lomo ni roha ni jolma na mangarajai jala bersiap ma nasida disi ndang adong ngolu na merdeka, lam dao ma nasida sian Debata jala angka sibolis nama mangisi ngoluna. Tarbuang nasida jala gabe bangso hatoban nasida siala pangalahona na maralo sian pangidoan ni Debata, tarrimas Debata tu bangsoNa i siala nunga ndang dipardulihon nasida be angka bagabaga dohot angka panurirang na paingoton bangso i terbuang ma nasida tu bangso na hebat tu Babel, Assur. Penyesalan na umbalga i do na naeng tabereng sian turpuk on, sian i diboto Jahowa na ingkon mulak do bangso i manopot Ibana.
Mulak do nasida di bagasan angka hitir jala dilului nasida Debata na setia maradophon bangsoNa. jala i do na pinangido ni Debata “Tu saluhut halak na tarbuang mulak ma ho tu Debata“ . Songon i tong di pangido Debata sian hita, unang be paima tingki, mulak ma saonari tu ulaoni Debata. Songon halak na tarbuang do hita, molo so Debata be manguluhon hita alani Dosa gabe tarbuang ma hita. Turpuk on mandok “Molo mulak hita tu Debata gabe Debata na mangulahon ngolunta jala masa ma asi ni roha ni Debata tu hita. Alani selagi ada kesempatan mulak ma hita tu Debata di paima do hamumulakta. Amen
TURPUK : 2 KORINT 4 : 6
Ai Debata, na mandokkon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na di bagasan bohi ni Kristus i.
HATORANGAN :
Di sejarah panompaon ni Debata di portibi on dohot nasa isina, taida do gogo dohot huaso ni Debata marhite hataNa laho manjadihon saluhutna. Di 1 Musa 1:3 didok: ”Dungi mangkuling muse ma Debata ninna : jadi ma ho na tiur, jadi tiur ma tutu”. Sian Debata do haroroan ni hatiuron i. Na manondangi saluhut portibi on. Suang songon i nang manondangi ngolu ni jolma. Sipata do holom panghilalaanta ala ni angka na masa di ngolunta. Olo do i ala ni angka godang ni sipingkiran dohot sisarihononhon ditongatonga ni keluarga. Boi do ala ni angka tuntutan ni angka ianakhon di parsikolaan. Boi do ala ni angka persoalan di angka ulaonta si ganup ari. Gabe sipata olo ma holom parnidaanta. Alai mardonganhon Debata sai na patiuronna do di hita dalan dohot angka na tasangkapi. Laos ima na paingot ni apostel Paulus tu huria Korint di turpuk on : “Ai Debata, na mandokhon marsinondang hatiuron i sian haholomon i, Ibana do patiurhon rohanami, pabinsar parbinotoan di sangap ni Debata, na dibagasan bohi ni Kristus “. Marragam angka na masa diadopi nasida, gabe mambahen nasida marsak jala mandele. Alai diadopi Apostel Paulus mangalami na songon i. Alai diparhatopot Apostel Paulus pangurupion ni Debata. Disondangi asi ni roha ni Debata do ibana mangadopi ragam ni angka sitaonon na masa tu ibana. Panindangion i ma naeng jumpang di huria Korint laho mangadopi ragam ni na masa di pardalanan ni ngolu nasida. Marhitehite haporseaon nasida na marsihohot tu Debata di bagasan Jesus Kristus naung manghophop nasida. Ibana do na tuk patiurhon roha dohot pingkiran ni sandok manisia na tongtong manghatindanghon hagogoon ni Debata.
Hita pe naeng ma songon i, tajalo ma hatiuron na sian Debata, lao manorangi rohanta na holom i asa tau hita marpanindangion di adopanNa, jala boi taulahon hombar tu lomo ni roha ni Debata. Amen.

TURPUK : SAKARIA 9 : 9 B
Ida ma, na ro ma rajam tumopot ho, partigor ibana jala siparmonang; na serep do rohana jala marsihundul di halode dohot di anak ni halode inaina.
HATORANGAN :
Bagabaga haroro ni Raja i manang Messias i nunga dilumbahon panurirang Sakarias tu bangso Israel, asa tongtong marsihohot jala manghaporseai Debata nasida. Naeng ma nian gomos nasida manghaporseai Debata asa tongtong nasida bertahan saleleng maradophon bangso na adong dihumaliang nasida siala na ingkon didongani Debata do angka bangso na mangasahon gogo ni Debata dohot na mardalan di bagasan hatigoran dohot habadiaon. Bagabaga ni panggomgomon hadameon ni na pinarbaga ni Debata di Sion tangkas do di paandar panurirang Sakarias di turpuk on. Debata sandiri do manopot bangsoNa marhite haroroan sada raja laho patuluson sangkap ni Debata. Raja na mamboan hadameon huhut paluaon angka na tarhurung. Raja partigor, siparmonang jala marserep maroha ima hasurungon ni Raja i sian raja na asing di portibi on. Haroro ni raja i hundul di atas halode dohot marpahean na sederhana. Haroro ni Raja i patuduhon hidup yang sederhana, jala harorona i mamboan haluoan tu sude lapisan hidup tanpa ada perbedaan. Marhite turpuk on dipaingot do hita nunga boha pangaradeonta laho manjangkon haroron i Raja i. Membuka diri i ma dalan manjangkon Raja i jala mamelehon diri asa gabe inganan ni Debata. Alani i tadasiphon ma pangaradeonta manjangkon Raja i sipalua i. Bongot ma hita tu ngolu habadiaon na hinalomohon raja i. Jala tapalendes ma dalan di Raja i ima Jesus Kristus Sipalua i marhite hamubaon ni roha sian angka hadosaonta dohot pardenggananta
tu Debata. Selamat menjalani Advent. Amen.

Tidak ada komentar:

Posting Komentar